Ils 27avels Gieus da litteratura

Quest onn declarain nus la litteratura sco «gieu». Scriver è in act solitari. Era leger fan ins sulet. Curt: in solitaire.

Ma betg per nus. Ils 27avels Dis da litteratura a Domat duain esser il salon da gieus, nua ch’ins chatta cumpogns per giugar. Preleger e tadlar, discussiunar e disputar, ristgar e desister, laschar or ina runda e parter mirveglias. Litteratura sco act collectiv, nua ch’il barat immediat tranter autura e lectur daventa la regla numer 1.

Lain guigar questa partida als 27avels Gieus da litteratura a Domat.

Noss gieus litterars da quest onn:

Neues aus dem Kopf è il program da solo da Manuel Stahlberger. El skizzescha, caricaturescha e chanta sur da grondas ideas e pitschnas persunas.

Living Library – la biblioteca viva. Ils cudeschs na pos ti dentant betg prender enta maun – na, cun quests cudeschs duais ti discurrer.

York Kauci alias Jürg Gautschi preschenta sia lecture performance Fitness, ina maschaida da prelecziun litterara e producziun performativa-scenica.

Shot-stories la saria: Ti empostas. L’autura arriva. Ella sesa e prelegia ses text. A la fin di ella: «Viva!», «Cin Cin!» u «Santé!» e tuts baivan da cumpagnia – ma il gieu cuntinuescha cun auters auturs.

Nossas auturas e nos litterats en discurs: Dumenic Andry, Linard Candreia, Annetta Ganzoni, Chatrina Josty, Mevina Puorger, Jessica Zuan e.a.

Il program detaglià suonda l’october 2017.

Natiralmain infurmain nus era sin Facebook davart ils Dis da litteratura.

Infurmaziun

Data e lieu

Ils Dis da litteratura (Ddl) han lieu dals 3 fin ils 5 da november 2017 en halla polivalenta Tircal a Domat.

Intent

Ils Ddl, il «Solothurn dals Rumantschs», porschan dapi l‘onn 1990 ad auturs ed auturas, ad amis da la litteratura ina plattafurma ed in‘occasiun per sa scuntrar, barattar ideas e survegnir novs impuls. Mintg‘onn vegnan preschentadas e discutadas novas ovras litteraras e lavurs linguisticas entaifer in motto general. Pel solit èn reservadas la sonda e la dumengia per la litteratura, durant che las sairadas vulan integrar er autras furmas culturalas (musica, teater, cabaret) e dar ina pussaivladad da seser ensemen tar in bierin da la bar litterara. Grazia a la derasaziun tras las medias – Radiotelevisiun Svizra Rumatscha (RTR) è noss partenari da medias – vegn cuntanschì in grond public entaifer ed ordaifer il Grischun. Ils Ddl promovan pia sco event cultural explicitamain l‘identitad culturala da la Rumantschia.

Organisaziun

Il comité dals Ddl, quai èn tschintg giuvnas e giuvens Rumantschs che vulan mantegnair ed avanzar quest event litterar, cultural ed ussa dapi 25 onns popular. Per che las 150 vals grischunas, lur abitants e lur idioms as possian scuntrar a Domat, lavura il comité cun bler idealissem e plaschair e per gronda part senza paja. L‘organisaziun tetgala dals Ddl è la Uniun per la Litteratura Rumantscha (ULR); ella sustegna e promova la litteratura rumantscha a moda integrala da lectorats professiunals fin la vendita da cudeschs. Entaifer la ULR è il comité dals Ddl dentant sulet respunsabel per il program, l‘organisaziun, la realisaziun e la finanziaziun dals Dis da litteratura.

Impressum

Patrunadi: Uniun per la Litteratura Rumantscha (ULR)
Comité d‘organisaziun: Laura Decurtins Rosset, Sara F. Hermann, Sereina Nay, Corina Schmed, Natalia Tuor
Creaziun: Theres Jörger, Annatina Nay
Programmaziun: Simon Wülser

Pressa

Pil mument na datti naginas communicaziuns da pressa.

Contact

Corina Schmed, responsabla per las medias
schmed@disdalitteratura.ch

Archiv

2016 Rispli sin pupi Telechargiar pachet dad archiv / Fotografias Ddl 2016
2015 Cuntrabanda Telechargiar pachet dad archiv
2014 Retrorumantsch Telechargiar pachet dad archiv
2013 A la carte Telechargiar pachet dad archiv
2012 Fantisar, fabular, raquintar … e tadlar Telechargiar pachet dad archiv
2011 Litterenza – Scienzatura Telechargiar pachet dad archiv
2010 Giubilar e festa far Telechargiar pachet dad archiv
1990-2010 Giubileum Telechargiar documentaziun

Sustegn

Partenaris

Sponsurs e fauturs