Ils 28avels Dis da litteratura

lls 28avels Dis da litteratura han il motto tranter lingias ed èn dals 2 fin ils 4 da november 2018 a Domat. Els sa deditgeschan al pled u meglier ditg al spazi tranter ils pleds. Tge è tranter (las) lingias? Tge capita en quest lieu? Igl è il spazi nua che l’autura e l’autur protegian la tensiun, la melodia, il messadi zuppà, forsa era critica e tabus.

La litteratura viva da tals spazis. Els èn in segund plaun da communicaziun. La lectura ed il lectur vegnan animads da reflectar, d’interpretar e d’udir trantertuns. Per exempel cun agid da metafras, allusiuns ed ironia. È l’essenza, la vaira muntada forsa be da chattar tranter lingias?

Premi Term Bel Suenter in onn pausa èsi quest onn puspè uschè lunsch: il Premi Term Bel turna als Dis da litteratura 2018. Lascha ir tia fantasia e scuvra tia creativitad!

Tes text sto esser…

✓ per rumantsch

✓ en furma da prosa

✓ max. 9’000 segns inclusiv vids

✓ nunpublitgà 

Valitaziun tenor criteris transparents 

Tes text vegn stimà da duas giurias differentas, mintgamai en furma anonima e tenor criteris objectivs che ti pos consultar qua. Quels criteris duessan dar impuls a las discussiuns en las giurias, mabain era esser in agid d’orientaziun per las auturas ed ils auturs che sa participeschan.

Nov andament en il final

Il Premi Term Bel ha quest onn in nov vestgì. Per pussibilitar ina valitaziun anc pli imparziala e faira resta la concurrenza enfin a la fin anonima. Ils nums da las scriventas e dals scrivents en il final vegnan relevads pir il davos durant la premiaziun. Omaduas giurias discuteschan tes text pia a moda anonima, ed  en il final vegn tes text prelegì d’ina pledadra u d’in pledader. 

L’ultim termin d’inoltraziun è ils 26 d’avust 2018 tar: derungs@disdalitteratura.ch

Il program detaglià suonda l’october 2018.

Natiralmain infurmain nus era sin Facebook davart ils Dis da litteratura.

Infurmaziun

Intent

Ils Ddl, il «Solothurn dals Rumantschs», porschan dapi l‘onn 1990 ad auturs ed auturas, ad amis da la litteratura ina plattafurma ed in‘occasiun per sa scuntrar, barattar ideas e survegnir novs impuls. Mintg‘onn vegnan preschentadas e discutadas novas ovras litteraras e lavurs linguisticas entaifer in motto general. Pel solit èn reservadas la sonda e la dumengia per la litteratura, durant che las sairadas vulan integrar er autras furmas culturalas (musica, teater, cabaret) e dar ina pussaivladad da seser ensemen tar in bierin da la bar litterara. Grazia a la derasaziun tras las medias – Radiotelevisiun Svizra Rumatscha (RTR) è noss partenari da medias – vegn cuntanschì in grond public entaifer ed ordaifer il Grischun. Ils Ddl promovan pia sco event cultural explicitamain l‘identitad culturala da la Rumantschia.

Organisaziun

Il comité dals Ddl, quai èn tschintg giuvnas rumantschas che vulan mantegnair ed avanzar quest event litterar, cultural ed ussa dapi 25 onns popular. Per che las 150 vals grischunas, lur abitants e lur idioms as possian scuntrar a Domat, lavura il comité cun bler idealissem e plaschair e per gronda part senza paja. L‘organisaziun tetgala dals Ddl è la Uniun per la Litteratura Rumantscha (ULR); ella sustegna e promova la litteratura rumantscha a moda integrala da lectorats professiunals fin la vendita da cudeschs. Entaifer la ULR è il comité dals Ddl dentant sulet respunsabel per il program, l‘organisaziun, la realisaziun e la finanziaziun dals Dis da litteratura.

Impressum

Patrunadi: Uniun per la Litteratura Rumantscha (ULR)
Comité d‘organisaziun: Nadina Derungs, Sara F. Hermann, Sereina Nay, Corina Schmed, Natalia Tuor
Creaziun: Jörger-Stauss, Annatina Nay
Programmaziun: Simon Wülser

Pressa

Pil mument na datti naginas communicaziuns da pressa.

Contact

Corina Schmed, responsabla per las medias
schmed@disdalitteratura.ch

Archiv

2017 Gieu Fotografias Ddl 2017
2016 Rispli sin pupi Telechargiar pachet dad archiv / Fotografias Ddl 2016
2015 Cuntrabanda Telechargiar pachet dad archiv
2014 Retrorumantsch Telechargiar pachet dad archiv
2013 A la carte Telechargiar pachet dad archiv
2012 Fantisar, fabular, raquintar … e tadlar Telechargiar pachet dad archiv
2011 Litterenza – Scienzatura Telechargiar pachet dad archiv
2010 Giubilar e festa far Telechargiar pachet dad archiv
1990-2010 Giubileum Telechargiar documentaziun

Sustegn

Partenaris

Sponsurs e fauturs