Ils 34avels Dis da litteratura – perfRomanza
Ils 1. e 2 da november sa transfurma la Postremise a Cuira en ina tribuna plain magia, diversitad e surpraisas. I vegn performà, i vegn discurrì, i vegn romantic, i vegn captivant. Durant dus dis pudais Vus viver las performanzas, prelecziuns e preschentaziuns – plain tensiun, varietad ed uschia anc mai visas. La romanza cun la performanza po cumenzar!
Sonda, 1-11-2025
| 10.00 – 10.15 |
Avertura |
La romanza cun la performanza cumenza. Ils Dis da litteratura prendan cumià da Domat ed arrivan a Cuira. La presidenta da l’Uniun per la Litteratura Rumantscha, Manuela Balett, dat il bainvegni. |
| 10.15 – 10.30 | Il text interactiv |
Il team dad RTR che scriva durant il festival in text interactiv cun participaziun dal public en sala ed online preschenta en in discurs cun la moderatura Esther Berther l’idea e l’andament da quest project litterar performativ. |
| 10.30 – 11.00 |
Blackout Biert |
Primaudiziun da la nova performance da Flurina Badel, victura dal Premi grischun da litteratura 2025. Sa basond sin ‹La müdada› da Cla Biert creescha ella cun la metoda da la blackout poetry – ina furma creativa da poesia, nua ch’in text existent vegn surmalegià cun nair, uschia ch’i restan be singuls pleds – in nov text. |
| 11.30 – 12.00 |
Ina istorgia d’amur polifona |
Ina sessantina da poesias d’amur rumantschas en tut ils idioms e da tschintg tschientaners reunescha la nova antologia ‹Amur. Poesias 1648–2025›. Las curaturas Annetta Ganzoni e Bettina Vital dattan in’invista en lur lavur da rimnar, selecziunar e publitgar. Questa romanza cun l’amur en vers raquintan Astrid Alexandre e Rees Coray lura vinavant musicalmain – cun novs arranschaments da chanzuns d’amur or da l’antologia. |
| 12.15 – 13.00 |
Flirt cun il microfon! |
In microfon avert sin il palc, pront per laschar strasunar VOSSA litteratura! Sper performanzas spontanas or dal public vegnan a preschentar lur texts era participant:as dal lavuratori ‹Scriver litterar› da la Lia Rumantscha, trais victur:as da la concurrenza da scriver Plima d’aur/Pledpierla e la represchentanta rumantscha al Campiunadi svizzer dal poetry slam, Selina Poo. Moderaziun: Claudio Spescha |
| 13.00 – 14.00 |
Gentar en cuminanza |
|
| 14.00 – 14.30 |
Tranter linguas e geners |
La scriptura Gianna Olinda Cadonau passa cun ses scriver tras las linguas rumantsch, tudestg, englais e franzos e tras ils geners poesia, prosa e teater. Ella preschenta texts novs e pli vegls, texts originals e translatads, publitgads e nun-publitgads. Moderaziun: Gabriela Holderegger Pajarola |
| 14.45 – 15.15 |
Spoken Word |
L’autura bernaisa cun ragischs grischunas Anaïs Meier preschenta sco giast d’ina autra regiun linguistica svizra texts da spoken word. Finalmain po ella duvrar ses quartet amà da trens ‹Fahrzeuge der RhB›: Il public decida cun la metoda da supertrumf tge texts che l’autura vegn a leger. |
| 15.45 – 16.30 |
Scriver litteratura performativa |
Co èsi da scriver in text che n’è betg destinà en emprima lingia per leger, mabain da scriver tocs da teater, gieus auditivs, performanzas u scenaris? Tge experientschas fan autur:as rumantsch:as cun scriver per public, palc e radio? Quant performativa è la litteratura rumantscha? Podium cun Daniel Badraun, Carin Caduff, Silvana Candreia e David Flepp, cun participaziun dal public e d’autur:as en sala. Moderaziun: Rico Valär |
| 17.00 – 17.30 |
Vernissascha dal cudesch ‹archiv› |
In text che va sut la pel: En ina lingua poetica e reducida tracta Asa Hendry il taschair en famiglia e la transmissiun da traumas tranter las generaziuns en l’agricultura da muntogna – ed avra uschia novas perspectivas sin il teater rumantsch contemporan. Festa da vernissascha cun prelecziun performativa dad Asa Hendry e Xdzunúm Danae Trejo-Boles. Moderaziun: Nadina Derungs Cun apero da vernissascha offert da la Chasa Editura Rumantscha. |
| 18.00 – 20.00 | Tschaina | |
| 20.00 – 21.15 |
Teater ‹Bab, siu archiv ed jeu› |
Il text performativ dad Asa Hendry, represchentà da trais acturs e d’in chor viril, sfundra en traumas zuppads dal mund puril. En il center stat il cumbat intern d’in figl cun il silenzi dal bab – in um marcà da greva lavur e plain istorgias taschentadas. Tranter raquintar e taschair, tranter regurdientscha e resistenza reflectescha il monolog cun chor la masculinitad egemoniala, l’influenza dal passà e la tschertga d’ina deliberaziun. Reschia: Rebekka Bangerter Scenografia: Lukas Sander Costums: Franka Manz Dramaturgia: Selina Beghetto Acturs: Bistgaun Capaul, Lorenzo Polin, Lorin Könz e chor viril ad hoc |
| 21.30 | Bar litterara |
Dumengia, 2-11-2025
| 10.00 – 10.30 |
En dialog |
Preschentaziun da la ‹Litteratura 44› da l’Uniun per la Litteratura Rumantscha ch’è deditgada al tema ‹En dialog› e cuntegna dialogs fictivs e reals, lungs e curts, armonics e conflictuals, dialogs che inspireschan, consoleschan, spaventan, intgantan, stimuleschan u transfurman. Il coredactur Benedetto Vigne preschenta e discutescha ensemen cun Fadrina Hofmann e Leo Tuor texts e tema da l’ediziun. |
| 10.45 – 11.30 |
Sfegliar e discutar |
Il roman ‹Davos ils mugrins› da Leontina Lergier-Caviezel raquinta d’ina tragedia da famiglia che perturbescha in entir vitg. Ils eveniments exacts restan in misteri. Anc onns pli tard chaschunan els exclusiun, inculpaziun e scuidanza en la cuminanza locala. Ina saga famigliara istorica e medemamain tragica e multifara ha publitgà quest atun il giuven autur turitgais Nelio Biedermann. Ses roman ‹Lázár› ha fatg furora en la scena litterara e vegn uss sin il tavulin dals Dis da litteratura. En la runda litterara discutan Viola Cadruvi, Fadrina Hofmann e Toni Vinzens. |
| 11.45 – 12.15 |
Jukebox giubilara |
Per il giubileum da 15 onns Chasa Editura Rumantscha datti ina selecziun da texts curts publitgads durant quest temp. Sco tar ina jukebox da musica po il public tscherner ses titels preferids. Tge texts e tge autur:as che sa zuppan davostiers è sa chapescha ina surpraisa. E tgi sa, forsa siglia perfin ina figura litterara or da la boxa imprevisibla! |
| 12.30 – 13.00 |
Premi da translaziun Viceversa |
Dumenic Andry vegn undrà cun il Premi da translaziun Viceversa da la Fundaziun Schiller svizra per sia translaziun rumantscha dad ‹Infanzia e bestiario› da Claudia Quadri (Premi svizzer da litteratura 2024), ch’è vegnida publitgada dad editionmevinapuorger l’atun passà. Surdada festiva dal premi e laudatio da la giuria. |
| 13.15 – 13.45 |
Performanza dal text interactiv |
Selina Beghetto e Jürg Gautschi preschentan ensemen cun la manadra da la partiziun reflexiun tar RTR Anna Serarda Campell il text litterar interactiv creà durant l’emprim di dal festival sin basa da votaziuns dal public sur place ed online. La lectura vegn transmessa live al Radio Rumantsch. |
| 13.45 | Finiziun |
Pleds finals ed aperitiv festiv offert da la Fundaziun Schiller svizra. |
Bigliets e prevendita
I dat in pass general per tut il festival incl. la represchentaziun da teater ubain bigliets per singuls blocs d’in mez di resp. per la saira da teater. Ils bigliets pon ins cumprar online sut quest link ubain a la cassa dal di en la Postremise.
Pretschs
CHF 100 pass general
CHF 80 cun reducziun per scolar:as e student:as
CHF 35 bloc da mez di (sonda avantmezdi, sonda suentermezdi, teater sonda saira, dumengia avantmezdi)
CHF 25 cun reducziun per scolar:as e student:as
Newsletter
Infurmaziun
Intent
Ils DDL, il «Solothurn dal:las Rumantsch:as», porschan dapi l‘onn 1990 ad autur:as, ad ami:as da la litteratura ina plattafurma ed in‘occasiun per sa scuntrar, barattar ideas e survegnir novs impuls. Mintg‘onn vegnan preschentadas e discutadas novas ovras litteraras e lavurs linguisticas entaifer in motto general. Per il solit èn reservadas la sonda e la dumengia per la litteratura, durant che la sonda saira vul integrar er autras furmas culturalas (musica, teater, cabaret) e dar ina pussaivladad da seser ensemen tar in bierin da la bar litterara. Grazia a la derasaziun tras las medias – Radiotelevisiun Svizra Rumatscha (RTR) è noss partenari da medias – vegn cuntanschì in grond public entaifer ed ordaifer il Grischun. Ils DDL promovan pia sco event cultural explicitamain l‘identitad culturala da la Rumantschia.
Impressum
Patrunadi: Uniun per la Litteratura Rumantscha (ULR)
Cumissiun da program: Gianna Olinda Cadonau, Viola Cadruvi, Nadina Derungs, Walter Rosselli, Rico Valär
Producziun: Gianna Duschletta, Rico Valär
Creaziun: Theres Jörger, Barbara Truog
Programmaziun: Simon Wülser
Contact
Per mailArchiv
| 2024 | crt&bn | Fotografias Ddl 2024 |
| 2023 | Corp | Fotografias Ddl 2023 |
| 2022 | Notg | Fotografias Ddl 2022 |
| 2021 | Giud via | Telechargiar pachet dad archiv / Fotografias Ddl 2021 |
| 2020 | Premi Term Bel (livestream) | Telechargiar pachet dad archiv |
| 2019 | (A)mar | Telechargiar pachet dad archiv / Fotografias Ddl 2019 |
| 2018 | Tranter lingias | Telechargiar pachet dad archiv / Fotografias Ddl 2018 |
| 2017 | Gieu | Telechargiar pachet dad archiv / Fotografias Ddl 2017 |
| 2016 | Rispli sin pupi | Telechargiar pachet dad archiv / Fotografias Ddl 2016 |
| 2015 | Cuntrabanda | Telechargiar pachet dad archiv |
| 2014 | Retrorumantsch | Telechargiar pachet dad archiv |
| 2013 | A la carte | Telechargiar pachet dad archiv |
| 2012 | Fantisar, fabular, raquintar … e tadlar | Telechargiar pachet dad archiv |
| 2011 | Litterenza – Scienzatura | Telechargiar pachet dad archiv |
| 2010 | Giubilar e festa far | Telechargiar pachet dad archiv |
| 1990-2010 | Giubileum | Telechargiar documentaziun |
