Ils 35avels Dis da litteratura – pèr a pèr

Dals 6 fin ils 8 da november sa transfurma la Postremise a Cuira en in lieu plain litteratura, inscunters e surpraisas. Sut il motto «pèr a pèr» vegn legì, raquintà, discutà, giugà e performà. Durant trais dis pudais vus scuvrir novas vuschs, inscuntrar pèrs spezials, sfundrar en il mund da la litteratura per uffants e giuvenils e surdar ensemen il Premi Term Bel.

Venderdi, 6-11-2026

19.30 Scriver litterar – festa finala L’emprima classa da l’emprim lavuratori Scriver litterar da la Lia Rumantscha preschenta texts novischems. Performativ e vi da maisa, prelegend e recitond, solo e pèr a pèr, dad aut e murmurond, en rumantsch e pluriling. Texts frestgs or dals ateliers da scriver. A la fin vegnan surdads ils diploms. Cun Daniel Badraun, Annemieke Buob, Gianna Olinda Cadonau, Uolf Candrian, Gianna Duschletta, Gerold Ehrsam, Nadia Rungger, Lucian Schucan, Timothée Zaremba. Moderaziun: Claudio Spescha

Sonda, 7-11-2026

10.00-10.15 Avertura Ils 35avels Dis da litteratura entschaivan. La presidenta da l’Uniun per la Litteratura Rumantscha, Manuela Balett, dat il bainvegni. Flavia Hobi preschenta la revista da la ULR, il nov numer da la ‹Litteratura›.
10.15-10.30 Il text interactiv Il team dad RTR che scriva durant la sonda dal festival in text interactiv pèr a pèr cun il public en sala ed online preschenta en in discurs cun la moderatura Esther Berther l’idea e l’andament da quest project litterar.
10.30-11.00 [tanter] Il pèrin artistic Janic Maskos (text) e Bigna Guler (musica) preschenta sia pli nova performanza litterar-musicala: Ina damaun decida el da betg esser oz l’uman sco uschiglio, el vegn or da sia pel e fa curaschi a l’animal. Suns battan e rebattan tranter di e notg, tranter stagiuns, chaud e fraid, uman e natira.
11.20-11.50 Quatter linzöls ed üna taila La pli nova publicaziun dad editionmevinapuorger porta il titel quadriling ‹Quattro lenzuola e una tela / Cater linzuei y na teila / Cuatri bleons e une tele / Quatter linzöls ed üna taila› ed è deditgada a la sentupada poetica da las linguas. Il rumantsch va pèr a pèr cun il ladin dolomitan, il furlan ed il talian. Per questa vernissascha prelegian trais da quatter autur:as preschentas en il cudesch lur texts e discutan las experientschas fatgas en quella sentupada litterara. Cun Nadia Rungger, Gianluca Franco e Göri Klainguti. Salid da Mevina Puorger. Moderaziun: Gabriele Zanello Suenter la vernissascha envidan editionmevinapuorger ed ils Dis da litteratura ad in aperitiv.
12.10-12.50 Papardets En ses emprim poemari, edì da la Chasa Editura Rumantscha, reunescha la poeta Nina Dazzi var 70 poesias ch’ans mainan tras cuntradas lontanas e spazis interns – da Cuba fin en l’Irlanda, da la mar fin en las muntognas engiadinaisas. Pèr a pèr sa mettan pleds, maletgs, egurdientschas e linguas en moviment e daventan nutriment per las foms e bramas da la vita. Moderaziun: Annetta Ganzoni
13.00 Gentar en cuminanza
14.00-14.40 Cësa da lat dijes tu Il pli nov cudesch da poesias da la poeta ladina Nadia Rungger, edì da Limbus Lyrik, porta il titel biling ‹cësa da lat dijes tu / milchhaus sagst du›. Las duas linguas, il ladin ed il tudestg, van pèr a pèr e restan en in dialog constant. Las poesias sa fatschentan cun impressiuns dal mintgadi e cun percepziuns da l’uman che sa mova tras la natira. La lectura vegn accumpagnada cun musica da clavazin da Linda Rungger.
15.00-16.30 Premi Term Bel I dat puspè el, il Premi Term Bel! Ils texts selecziunads or da tut las inoltraziuns vegnan prelegids da lur autur:as e suenter discutads da la giuria tranter pèr. Sper il premi da la giuria pon tut:tas en sala votar, tge text che survegn il premi dal public. Cun texts da: Romedi Arquint, Martina Cantieni, Claudia Cathomas, Annatina Nay, Sidonia Pazeller. Da la giuria fan part: Anita Capaul, Marietta Cathomas Manetsch e David Truttmann. Moderaziun: Ladina Caduff
17.00-17.45 Carschen uost Scrit avant passa 40 onns ed anc adina actual e relevant: En ‹Carschen uost› raquinta Imelda Coray-Monn (1933–2009) d’ina dunna che cumbatta tranter lètg, maternitad, crisas psichicas e clamada cun las aspectativas da ses conturn. La Chasa Editura Rumantscha sa legra da festivar ensemen cun vus la vernissascha da quest roman (re)scuvert en l’Archiv da cultura da dunnas dal Grischun. Discussiun da podium cun la figlia da l’autura Renata Coray, l’archivara Silke Redolfi ed il team editorial Viola Cadruvi e Rico Valär. Prelecziun: Angela Collenberg. Accumpagnament musical: Ursina Suenter la vernissascha envidan la Chasa Editura Rumantscha ed ils Dis da litteratura ad in aperitiv.
18.15 Tschaina
20.00-21.30 Nus tschertgain il pèr perfect! Tschertgai e chattai ensemen cun nus il pèr perfect. Quatter pèrs ineguals cumbattan in cunter l’auter en ina cumpetiziun ludica per la pli gronda canera e la pli gronda favur dal public. Cun Sara-Bigna Janett e Flurin Caviezel, Selina Beghetto e Jürg Gautschi, Romana Ganzoni ed Ivo Orlik (Giganto), Domenic Janett e DJ Giannex. Moderaziun: David Flepp
21.30 Literarische Bar

Dumengia, 8-11-2026

10.00-10.40 Litteratura rumantscha per uffants e giuvenils In gener litterar actual ed impurtant che va pèr a pèr cun la belletristica per creschids è la litteratura per uffants e giuvenils. Ils ultims dus onns èn cumparidas bleras novas ediziuns ed i dat diversas novas iniziativas multimedialas en quel connex. Ina runda da discussiun reunescha invistas en cudeschs, experientschas da scriver e reflexiuns editorialas. Cun Daniel Badraun, Fadrina Hofmann, Gabriela Holderegger-Pajarola e Karin Kohler-Pattis. Moderaziun: Gabriela Holderegger-Pajarola
11.00-11.40 Dicziunari illustrà per uffants Pèr a pèr cun l’illustratura Cilgia Zangger ha la Lia Rumantscha sviluppà in nov dicziunari per uffants. En il rom d’in lavuratori live cun e per uffants preschentan l’illustratura e l’editura patratgs, process e purtrets en connex cun quest cudesch. Uffants èn bainvegnids!
12.00-12.40 Il chastè magic Frestg or da la stampa – e gist era frestg or dal studio! En il nov cudesch da Viola Cadruvi, edì da la Chasa Editura Rumantscha, emprendan ils trais uffants Edvina, Merlin e Lexi da striunar en ina scola magica lunsch si en las muntognas grischunas. RTR ha registrà las set istorgias da preleger sco gieus auditivs. En ina prelecziun scenica porta l’autura Viola Cadruvi ensemen cun Michel Decurtins ed Olivia Spinatsch dad RTR e l’editura Karin Kohler-Pattis ina da las istorgias live sin tribuna. Uffants èn bainvegnids!
12.50-13.15 Surdada dal Premi Term Bel e finiziun La giuria tegna sia laudatio e surdat il Premi Term Bel tant sco il premi dal public. Ursin Fetz, il president da la Vischnanca burgaisa Domat, surdat l’obelisc a la:il victur:a che prelegia anc ina giada ses text. Il team dal text interactiv dad RTR raquinta da l’experientscha pèr a pèr cun il public. La ULR ed ils organisaturs dattan il salid final.

Impressiuns

Fotografias: Mattias Nutt/RTR

Newsletter

Restai infurmadas ed infurmads – tut las novitads datti il futur mo pli en furma digitala. As annunziai uss per nossa newsletter per retschaiver tuttas infurmaziuns davart il festival!
Premum:

 

Bigliets e prevendita

I dat in pass general per tut il festival incl. la represchentaziun da teater ubain bigliets per singuls blocs d’in mez di resp. per la sonda saira. Ils bigliets pon ins cumprar online sut quest link ubain a la cassa dal di en la Postremise.

Pretschs

CHF 100 pass general

CHF 80 cun reducziun per scolar:as e student:as

CHF 35 bloc da mez di (sonda avantmezdi, sonda suentermezdi, sonda saira, dumengia avantmezdi)

CHF 25 cun reducziun per scolar:as e student:as

CHF 20 preludi il venderdi saira

CHF 15 preludi il venderdi saira cun reducziun

CHF 10 per uffants la dumengia avantmezdi

Infurmaziun

Intent

Ils DDL, il «Solothurn dal:las Rumantsch:as», porschan dapi l‘onn 1990 ad autur:as, ad ami:as da la litteratura ina plattafurma ed in‘occasiun per sa scuntrar, barattar ideas e survegnir novs impuls. Mintg‘onn vegnan preschentadas e discutadas novas ovras litteraras e lavurs linguisticas entaifer in motto general. Per il solit èn reservadas la sonda e la dumengia per la litteratura, durant che la sonda saira vul integrar er autras furmas culturalas (musica, teater, cabaret) e dar ina pussaivladad da seser ensemen tar in bierin da la bar litterara. Grazia a la derasaziun tras las medias – Radiotelevisiun Svizra Rumatscha (RTR) è noss partenari da medias – vegn cuntanschì in grond public entaifer ed ordaifer il Grischun. Ils DDL promovan pia sco event cultural explicitamain l‘identitad culturala da la Rumantschia.

Impressum

Patrunadi: Uniun per la Litteratura Rumantscha (ULR) Cumissiun da program: Gianna Olinda Cadonau, Viola Cadruvi, Nadina Derungs, Walter Rosselli, Rico Valär
Producziun: Gianna Duschletta, Rico Valär
Creaziun: Theres Jörger, Barbara Truog
Programmaziun: Simon Wülser

Archiv

2025 perfRomanza Fotografias Ddl 2025
2024 crt&bn Fotografias Ddl 2024
2023 Corp Fotografias Ddl 2023
2022 Notg Fotografias Ddl 2022
2021 Giud via Telechargiar pachet dad archiv / Fotografias Ddl 2021
2020 Premi Term Bel (livestream) Telechargiar pachet dad archiv
2019 (A)mar Telechargiar pachet dad archiv / Fotografias Ddl 2019
2018 Tranter lingias Telechargiar pachet dad archiv / Fotografias Ddl 2018
2017 Gieu  Telechargiar pachet dad archiv / Fotografias Ddl 2017
2016 Rispli sin pupi Telechargiar pachet dad archiv / Fotografias Ddl 2016
2015 Cuntrabanda Telechargiar pachet dad archiv
2014 Retrorumantsch Telechargiar pachet dad archiv
2013 A la carte Telechargiar pachet dad archiv
2012 Fantisar, fabular, raquintar … e tadlar Telechargiar pachet dad archiv
2011 Litterenza – Scienzatura Telechargiar pachet dad archiv
2010 Giubilar e festa far Telechargiar pachet dad archiv
1990-2010 Giubileum Telechargiar documentaziun

Sustegn

Partenadis

Sponsurs e fauturs