Ils 30avels Dis da litteratura 2021

 

Il Premi Term Bel va online

La concurrenza litterara Premi Term Bel ha lieu quest onn en furma digitala: sonda, ils 7 da november 2020. A partir da las 15.00 prelegian las duas finalistas ed ils trais finalists e discuta la giuria publicamain ils texts nominads. Il public ha la pussaivladad da dar giu sia vusch per ses text favurit via e-voting. Il punct culminant è la surdada dals premis, sponsurisads da la Vischnanca burgaisa Domat.

Nus infurmain era sin Facebook ed Instagram davart ils Dis da litteratura.

Pervia da la situaziun actuala è la 30avla ediziun dals Dis da litteratura vegnida spustada sin l’onn proxim. Il comité vul realisar in festival da giubileum cumplet e festiv che preschenta l’ovra litterara actuala e dat spazi per inscunters inspirants. Quai na fiss betg stà pussaivel quest onn.
Persuenter vegn la concurrenza litterara Premi Term Bel realisada a moda digitala. Las finalistas ed ils finalists prelegian e la giuria d’experts discuta live via videostream.

Betg manchentai la discussiun e la premiaziun: sonda, ils 7 da november 2020, a partir da las 15.00.
En il final èn:

– “Battavent” da Dominique Caglia Dosch
– “In senza” da Martin Cantieni
– “Ella u jau.” da Roman Caviezel
– “November” da Sidonia Pazeller
– “Toxissems” da Benedetto Vigne

Giuria: Gianna Olinda Cadonau, Anna-Alice Dazzi, Renzo Caduff
Moderaziun: Anna Serarda Campell


Il link d’access sco era ils texts nominads vegnan publitgads l’entschatta da november sin www.disdalitteratura.ch. Era quest onn ha il public la pussaivladad da votar per ses text preferì.

Il Premi Term Bel vegn sponsurà da la Vischnanca burgaisa Domat ed ha lieu mintga dus onns. Il premi da la giuria è dotà cun 3’000 francs, il premi dal public cun 1’500 francs.

Il videostream vegn pussibilità grazia a Radiotelevisiun Svizra Rumantscha (RTR).

Infurmaziun

Intent

Ils Ddl, il «Solothurn dals Rumantschs», porschan dapi l‘onn 1990 ad auturs ed auturas, ad amis da la litteratura ina plattafurma ed in‘occasiun per sa scuntrar, barattar ideas e survegnir novs impuls. Mintg‘onn vegnan preschentadas e discutadas novas ovras litteraras e lavurs linguisticas entaifer in motto general. Per il solit èn reservadas la sonda e la dumengia per la litteratura, durant che las sairadas vulan integrar er autras furmas culturalas (musica, teater, cabaret) e dar ina pussaivladad da seser ensemen tar in bierin da la bar litterara. Grazia a la derasaziun tras las medias – Radiotelevisiun Svizra Rumatscha (RTR) è noss partenari da medias – vegn cuntanschì in grond public entaifer ed ordaifer il Grischun. Ils Ddl promovan pia sco event cultural explicitamain l‘identitad culturala da la Rumantschia.

Organisaziun

Il comité dals Ddl, quai èn tschintg RumantschAs che vulan mantegnair ed avanzar quest event litterar, cultural ed ussa dapi 30 onns popular. Per che las 150 valladas grischunas, lur abitants e lur idioms as possian scuntrar a Domat, lavura il comité cun bler idealissem e plaschair e per gronda part senza paja. L‘organisaziun tetgala dals Ddl è la Uniun per la Litteratura Rumantscha (ULR); ella sustegna e promova la litteratura rumantscha a moda integrala da lectorats professiunals fin la vendita da cudeschs. Entaifer la ULR è il comité dals Ddl dentant sulet respunsabel per il program, l‘organisaziun, la realisaziun e la finanziaziun dals Dis da litteratura.

Impressum

Patrunadi: Uniun per la Litteratura Rumantscha (ULR)
Comité d‘organisaziun: Nadina Derungs, Sara F. Hermann, Sereina Nay, Toni Vinzens, Ralf Beer
Creaziun: Jörger-Stauss, Annatina Nay
Programmaziun: Simon Wülser

Pressa

Communicaziun dals 03-11-2019

Contact

Ralf Beer, responsabel per las medias
beer@disdalitteratura.ch

Archiv

2019 (A)mar Telechargiar pachet dad archiv / Fotografias Ddl 2019
2018 Tranter lingias Telechargiar pachet dad archiv / Fotografias Ddl 2018
2017 Gieu  Telechargiar pachet dad archiv / Fotografias Ddl 2017
2016 Rispli sin pupi Telechargiar pachet dad archiv / Fotografias Ddl 2016
2015 Cuntrabanda Telechargiar pachet dad archiv
2014 Retrorumantsch Telechargiar pachet dad archiv
2013 A la carte Telechargiar pachet dad archiv
2012 Fantisar, fabular, raquintar … e tadlar Telechargiar pachet dad archiv
2011 Litterenza – Scienzatura Telechargiar pachet dad archiv
2010 Giubilar e festa far Telechargiar pachet dad archiv
1990-2010 Giubileum Telechargiar documentaziun

Sustegn

Partenaris

Sponsurs e fauturs